କୋଲକାତା: ୨୦୧୪ରୁ ପଶ୍ଚିମବଙ୍ଗ ପ୍ରଦେଶ କଂଗ୍ରେସ ସଭାପତି ଭାବେ ଦାୟିତ୍ବ ତୁଲାଇ ଆସୁଥିବା ପୂର୍ବତନ ସାଂସଦ ଅଧୀର ରଞ୍ଜନ ଚୌଧୁରୀଙ୍କୁ ଦଳ ପଦବିରୁ ହଟାଇଦେଇଛି। ଦଳର ଏଭଳି ପଦକ୍ଷେପକୁ ନେଇ ଅଧୀର ରଞ୍ଜନ ତୀବ୍ର ସମାଲୋଚନା କରିଛନ୍ତି। ଗଣମାଧ୍ୟମକୁ ଅଧୀର କହିଛନ୍ତି, ଲୋକସଭା ନିର୍ବାଚନରେ ପରାଜୟ ପରେ ସେ ଦଳରୁ ଇସ୍ତଫା ଦେଇଥିଲେ। ଇସ୍ତଫା ପତ୍ରକୁ ଦଳ ଗ୍ରହଣ କଲା କିମ୍ବା ଅଗ୍ରାହ୍ୟ କଲା ସେକଥା ଜଣାଇଲା ନାହିଁ। ସେ କହିଛନ୍ତି, କଂଗ୍ରେସର ସମ୍ବିଧାନ ଅନୁସାରେ ଯେଉଁଦିନ ମଲ୍ଲିକାର୍ଜୁନ ଖଡ଼ଗେ ଦଳର ସଭାପତି ହେଲେ ସେହି ସମୟରେ ଦେଶରେ ଦଳର ସମସ୍ତ କର୍ମକର୍ତ୍ତାଙ୍କ ପଦବି ମଧ୍ୟ ଅସ୍ଥାୟୀ ହୋଇଯାଇଥିଲା। ଯେତେବେଳେ ନିର୍ବାଚନ ଚାଲିଥିଲା ସେତେବେଳେ ଖଡ଼ଗେ ଟେଲିଭିଜନରେ କହିଥିଲେ ଯଦି ଆବଶ୍ୟକ ହୁଏ ତେବେ ତାଙ୍କୁ ଅଲଗା ରଖାଯିବ, ଏହା ତାଙ୍କୁ ଦୁଃଖ ଦେଇଥିଲା। ନିର୍ବାଚନ ପରେ ସେ ଖଡ଼ଗେଙ୍କୁ କହିଥିଲେ ତାଙ୍କ ବଦଳରେ ଆଉ କାହାରିକୁ ଦାୟିତ୍ବ ଦିଅନ୍ତୁ। କିନ୍ତୁ ଦଳ କୌଣସି ପ୍ରତିକ୍ରିୟା ଦେଇନଥିଲା। ଏବେ ତାଙ୍କ ଅଧ୍ୟକ୍ଷତାରେ ପଶ୍ଚିମବଙ୍ଗ ରାଜ୍ୟ କଂଗ୍ରେସର ବୈଠକ ଡାକିବାକୁ ଏଆଇସିସି କହିଥିଲା। ନିର୍ଦ୍ଦେଶାନୁସାରେ ସେ ବୈଠକ ଆୟୋଜନ କରିଥିଲେ। ବୈଠକରେ ଗୁଲାମ ଅଲି ମିର୍ ମୋତେ ଦେଖାଇ କହିଥିଲେ ଯେ ଏଠାରେ ଦଳର ପୂର୍ବ ସଭାପତି ବସିଛନ୍ତି। ସେଠାରେ ଜାଣିଲି ମୋର ପଦବି ଯାଇଛି।