ଗଣେଶ ପୂଜାକୁ ଏବେ ମାତ୍ର ୧୦ ଦିନ ବାକି ରହିଛି । ସବୁ କ୍ଲବ୍ ଓ କମିଟିରେ ଜୋର୍ଦାର ପ୍ରସ୍ତୁତି ଚାଲିଛି । ଏହା ମଧ୍ୟରେ ପୁଲିସ କାନରେ କିଛି ବେଆଇନ ଚାନ୍ଦା ମଗାଯିବା ବିଷୟ ପଡ଼ିଛି । ତେଣୁ ପୁଲିସ ଏବେ ତାର ଆଭିମୁଖ୍ୟକୁ ଅଧିକ କଡ଼ା କରିଛି । ଗତ ୧୭ ତାରିଖ ଦିନ ପ୍ରଥମେ ପୁଲିସ କମିସନର ଗଣେଶ ପୂଜା ପ୍ରସ୍ତୁତି ବୈଠକରେ ଏନେଇ ଚେତାଇ ଦେଇଥିଲେ । ବାକି ସବୁ ଜୋନ୍ ଓ ଥାନା ସ୍ତରୀୟ ବୈଠକରେ ମଧ୍ୟ ଏଡିସିପି ଓ ଏସିପିମାନେ ଜବରଦସ୍ତ ଚାନ୍ଦା ମଗାକୁ ଦୂରରୁ ଜୁହାର ବୋଲି କହିଦେଇଥିଲେ । ଆଉ ଏବେ ପୂଜା ପାଖେଇ ଆସିବାରୁ କିଛି ଅସାଧୁ ଯୁବକ ଟଙ୍କା ପଇସା ନେଇ ଜୁଲମ କରୁଥିବା ଖବର ପୁଲିସ ପାଖକୁ ଆସୁଛି । ତେଣୁ ଏହି ଜୁଲମକୁ ସହ୍ୟ ନକରି ତୁରନ୍ତ ପୁଲିସକୁ ଫୋନ୍ କରି ଜଣାଇବାକୁ ଏଡିସିପି ଅନିଲ ମିଶ୍ର ଅପିଲ୍ କରିଛନ୍ତି । ପୂର୍ବରୁ ଷ୍ଟ୍ରିଟ୍ କ୍ରାଇମ୍ ନେଇ ସୂଚନା ଦେବାକୁ କଟକ ପୁଲିସ ଏକ ସ୍ୱତନ୍ତ୍ର ନମ୍ବର ଜାରି କରିଥିଲା । ଏବେ ସେହି ନମ୍ବର ଅର୍ଥାତ୍ (୭୯୭୮୮୯୪୪୦୫) ରେ ତୁରନ୍ତ କଲ୍ କରି ସଂପୂର୍ଣ୍ଣ ବିଷୟ ଜଣାଇବାକୁ ଶ୍ରୀ ମିଶ୍ର କହିଛନ୍ତି । ଅଭିଯୋଗକାରୀ ବା ସୂଚନଦାତାଙ୍କ ନାମ ଗୋପନ ରଖାଯାଇ କାର୍ଯ୍ୟାନୁଷ୍ଠାନ ନିଆଯିବ । ସୂଚନା ପାଇବା ପରେ ପୁରା ଜାଲ ବିଛାଇ ସଂପୃକ୍ତ ଯୁବକଙ୍କୁ ଗିରଫ କରିବ । ତେବେ ପୂର୍ବ ଦୁଇରୁ ତିନି ବର୍ଷ ହେବ ଦଶହରା ସମୟରେ ପୁଲିସ ପକ୍ଷରୁ ‘ଦାଦା ବଟିକୁ ନା’ ବୋଲି ସ୍ଲୋଗାନ୍ ଦିଆଯାଇ ବଟି ଉପରେ ବହୁ ମାତ୍ରାରେ ନିୟନ୍ତ୍ରଣ ଅଣାଯାଇପାରିଛି ।
ଏପରିକି ଚାନ୍ଦା ମାଗିବା ଅଭିଯୋଗରେ ବହୁ ପ୍ରତିଷ୍ଠିତ ବଜାର କମିଟିର ସଭାପତି ଓ ସଂପାଦକ ଗିରଫ ହୋଇ ଜେଲ୍ ମଧ୍ୟ ଯାଇଛନ୍ତି । ତେଣୁ ଚଳିତ ବର୍ଷ ପାର୍ବଣ ଆରମ୍ଭ ପୂର୍ବରୁ ପୁଲିସ ପୁରା ଆକ୍ସନ୍ ମୋଡ୍ରେ ଅଛି । ବର୍ଷକୁ ବର୍ଷ ଗଣେଶ ପୂଜା ଅଧିକ ଜାକଜମକରେ ହେଉଛି । ଖର୍ଚ୍ଚ ପାଇଁ ଅଧିକ ବଜେଟ୍ ମଧ୍ୟ ରହୁଛି । ତେଣୁ କିଛି କମିଟି ବା କ୍ଲବ୍ ଜୁଲମ କରି ଚାନ୍ଦା ନେଉଥିବା ଅଭିଯୋଗ ଆସୁଛି । ତେଣୁ ପୁଲିସ ତାହାକୁ ଦୃଢ଼ ହସ୍ତରେ ଦମନ କରିବାକୁ ଏଭଳି କରିଥିବା ଶ୍ରୀ ମିଶ୍ର ସୂଚନା ଦେଇଛନ୍ତି । ଏହା ଚଳିତ ବର୍ଷ ପାର୍ବଣ ଶେଷ ପର୍ଯ୍ୟନ୍ତ ବଳବତ୍ତର ରହିବ ।